MJUMBE WA HALMASHAURI KUU YA CCM TAIFA NEC MAHAMUDU MADENGE ATOA ELIMU KWA WAKRISTO JUU YA MAANDAMANO YA WANASIASA

MNEC MAHAMUDU MADENGE

Akiimba pamoja na waumini wa kanisa hilo

Akipongezwa kwa nasaha nzuri

Pongezei ziliendelea

Akipewa zawadi ya CD moja baada ya kuzindua albamu ya mwimbaji huyo

Baadhi ya waumini waliokuwepo

wengine walikaa upande huu

Hapa akiagwa kwa shamrashamra kubwa

MJUMBE wa Halmashauri Kuu ya Chama cha Mapinduzi (NEC-CCM), Mahamudu Madenge amewaambiwa wakristo wenye nia ya kushiriki maandamano yanayoitishwa na wanasiasa kwa nia mbaya kwamba yanawaweka jirani na dhambi.

Hivi karibuni Chama cha Demokrasia na Maendeleo (Chadema) kupitia Mwenyekiti wake Freeman Mbowe kilitangaza kuitisha maandamano yasio na ukomo nchini nzima kwa lengo la kushinikiza kusitishwa kwa Bunge la Katiba.

Wakati baadhi ya wanasiasa na wafuasi wa chama hicho wakiyaunga mkono maandamano hayo ambayo hata hivyo yamedhibitiwa na Polisi, wananchi wengi wamenukuliwa na vyombo mbalimbali vya habari wakiyaponda kwa kile walichosema yanalenga kuvuruga amani ya nchi na kuchochea uhalifu.

“Tuache kufuata mikumbo ya siasa, kama tunataka maandamano, tuandamane kuelekea makanisani na kufanya kazi inayompendeza Mungu, tuishi kama alivyoishi Yesu” alisema Madenge anayeshikilia nafasi hiyo nyeti kupitia manispaa ya Iringa.

Aliyasema hayo kwenye uzinduzi wa albamu ya injili ya muimbaji Yusuph Ngaluoka wa kanisa la Tanzania Assemblies of God (TAG) la mjini Iringa, uliofanyika jana katika ukumbi wa Highlands mjini hapa.

Akiunga mkono kazi inayofanywa na muimbaji huyo, Madenge alitoa mchango wa Sh Milioni moja na kuwataka watanzania wengine kuunga mkono kazi za wasanii wa injili kama wanavyofanya kwa wasanii wengine.

“Wasanii wa injili wanahubiri upendo, amani na utulivu. Na sisi wote tunataka kuishi katika hali ya upendo, amani na utulivu; ni muhimu tukawaogopa wanaotoka kutuingiza kwenye machafuko,” alisema huku akishangiliwa na mamia ya waumini wa dini hiyo waliojitokeza katika uzinduzi huo.

Alisema kama ilivyoandikwa katika kitabu kitakatifu cha Biblia kwamba wenye moyo safi ndio watakaomuona Mungu ni muhimu wanadamu wakatafakari na kuzipuuza kauli za wanasiasa zinazoweza kuwaondoa katika sifa hiyo.

Wakati akichangia kiasi hicho cha fedha, Madenge aliimba pamoja na waumini hao wimbo maarufu unaotumiwa na wakristo kwenye shughuli mbalimbali wa “Mungu ni Pendo, apenda watu, Mungu ni Pendo anipenda.”

Wakati wimbo huo ukiendelea kuimbwa, Madenge alisema alichagua kufanya kazi ya jamii hivyo haoni sababu ya kuogopa kushirikiana na watu wa makundi mbalimbali pale anapohitajika au kuombwa kufanya hivyo.  

Akishukuru kwa mchango wa Madenge na nasaha zake, muimbaji huyo alimtaja kiongozi huyo kama mmoja wa viongozi wa mfano mwenye moyo wa kusaidia jamii kila anapoombwa kufanya hivyo.

“Mungu akubariki ; nitalia kwa Mungu ili akupe zaidi na zaidi na afanye kitu juu yako utakachokikumbuka katika maisha yako yote,” alisema mbele ya mamia ya waumini wa kanisa hilo waliofurika katika ukumbi huo.