ZIARA YA RAIS JAKAYA MRISHO KIKWETE LEO YAHITIMISHWA MKOANI NJOMBE IKIWA NI SIKU YA SITA LEO TANGU KUANZA ZIARA YAKE MKOANI HAPA

 VIFAA VYA KUFULIA MADINI YA CHUMA NA MATENGENEZO YA MIUNDOMBINU YA BARABARA VYAANZA KUFIKA

Rais Jakaya Kikwete Amemuagiza Mkuu wa Mkoa wa Njombe Keptein Mstaafu Aseri Msangi Pamoja na Watendaji Wake Kufuatili Shilingi Bilioni Kumi Zilizotolewa na Serikali Kwa Ajili ya Kuwalipa Wakulima wa Mahindi Wilayani Ludewa Ambao Wanaidai Serikali.

Aidha Rais Kikwete Pia Imeitaka Halmashauri  ya Makete Kwa Kushirikiana na Uongozi wa Mkoa  wa Njombe Kuwabana  Watu Wanaonunua Zao la Pareto Kutoka Kwa Wakulima Bila Kufuata Taratibu Zinazohusika na Kukwepa Kulipa Kodi na Kuwakandamiza Wakulima wa Zao Hilo.

Akiongea Wakati wa Majumuisho ya Ziara Yake ya Kikazi  ya Takribani Siku Sita Mkoani Njombe Kwenye Ukumbi wa Halmashauri ya Wilaya ya Njombe Rais Kikwete Ameruhususu Sekta Binafsi Kununua Mahindi ya Wakulima Yaliyosalia Kwa Wakulima.

Halikadhali Rais Kikwete Amewataka Viongozi wa Mkoa wa Njombe Kuendelea Kusisitiza Mazao ya Biashara Ikiwemo Miti ya Mbao ,Kahawa ,Matunda na Mbogamboga Pamoja na Kufufua Zao la Pareto

Akielezea Kuhusu Miundombinu Mbalimbali Mkoani Njombe Rais Kikwete Amesema Serikali Iko Katika Mchakato wa Kuhakikisha Wananchi Wanapata Huduma za Umeme,  Maji, Mawasiliano, Afya Pamoja na Ujenzi wa Barabara za Lami Zinazounganisha Makao Makuu ya Mkoa wa Njombe na Wilaya Zake Kupitia mpango wa Matokeo Makubwa Sasa .

Rais Jakaya Kikwete Hii Leo Amehitimisha Ziara Yake ya Kikazi ya Siku Sita Kwa Kufanya Majumuisho  ya Sehemu Zote Alizotembelea Katika Wilaya za Mkoa wa Njombe Huku Akiwapongeza Wananchi Kwa Kushirikiana na Serikali Katika Shughuli za Maendeleo

Hapo jana akielekea  viwanja vya Liganga Rais Kikwete ,Wakazi wa vijiji vya Madope, Mlangali na Luana katika wilaya ya Ludewa Mkoani Njombe, wamezuia msafara wa Rais Jakaya Kikwete na kumweleza kero zao mbalimbali ikiwemo ya kuidai serikali malipo yao ya mahindi iliyoyanunua kwa ajili ya kuhifadhi kwenye maghala ya taifa pamoja na kuwatafutia soko la mahindi kutokana na serikali kujaza maghala yake ya chakula cha ziada katika maghala yake, na kumtaka kuwajengea kwa kiwango cha lami barabara ya Itoni-Ludewa-Manda inayotoka Njombe kupita Ludewa Mjini hadi Manda.

Kero nyingine zilizotajwa na wananchi hao ni kujengewa miundombinu ya mawasiliano, maji, umeme na maabara katika maeneo yao ili kuweza kupiga hatua kimaendeleo.

Matukio hayo yalitokea kwa nyakati tofauti majira ya saa 5 asubuhi na saa 6 mchana wakati msafara wa Rais  ukitoka Njombe kueleke wilayani Makete. 

 

Kituko katika msafara huo ni pale wakazi wa kijiji cha Mlangali walipousimamisha msafara huo huku wakiwa wamebeba mabango yenye kuwasilisha ujumbe wa kero zao, likiwemo   lililosomeka “Barabara kero tutakufa bila kuona barabara ya lami, hatutaki mbolea ya minjingu tunataka DAP, miaka 50 ya uhuru bado tunatumia vibatari na tuna kero ya kutolipwa hela za mahindi na huduma ya maji kero” yaliyotosha kabisa kumfikishia ujumbe Rais Kikwete kwamba wananchi hao wanahitaji nini.

Wananchi hao walisema pamoja na kuiuzia serikali mahindi yao lakini mpaka sasa wengi wao hawajapata fedha zao, huku wengine mahindi yao yakibaki ndani ya nyumba zao kutokana na kukosa soko na hivyo kuhoji wakauzie wapi.

Pamoja na kero hiyo wananchi hao wa Mlangali waliwasilisha kero la gari la wagonjwa (Ambulance) ambapo walidai pamoja na kuletewa gari hilo likimekuwa likikaa Ludewa mjini hali ambayo inawapa taabu pindi wanapohitaji kuwahisha wagonjwa, na kwamba limekuwa likionekana katika kituo chao cha afya pale tu wanapokuja viongozi wa kitaifa.

Hata Rais Kikwete alisema serikali iko kwenye mpango wa kutatua changamoto hizo, ambapo hadi Disemba mwaka 2014 itakuwa imejenga miundo mbinu ya umeme katika vijiji 74 vya wilaya hiyo, maji vijiji 10 na minara ya mawasiliano katika vijiji vitano kikiwemo kijiji cha Madope pamoja na kujenga zahati katika kijiji Luana, ujenzi ambao kwa kuanza amechangia sh. 2 milioni pamoja na mabati 100, na kuongeza vijiji ambavyo havitapa huduma hizo katika mpango wa mwaka huu visubiri awamu ya pili ya utekelezaji wa miradi.

Kuhusu ujenzi wa barabara ya lami kutoka Njombe-Ludewa-Manda (Itoni-Ludewa-Manda) alisema serikali iko kwenye matayarisho ya ujenzi wa barabara hiyo kwa kuwa iko katika utekelezaji wa ilani ya uchaguzi ya CCM.

“Barabara ya lami tutajenga lakini siyo leo, kwa sasa iko kwenye matayarisho na mchakato wake utakapokamilika tutaanza kuijenga alisema,” Rais Kikwete.

Kuhusu madai ya mahindi aliwaahidi wananchi hao kuwa fedha zao watalipwa muda siyo mrefu kuanzia sasa, na kuwataka kuuza mahindi yao yaliyobaki kwa taasisi binafsi kwa kuwa maghala ya taifa ya hifadhi ya chakula yamejaa kwani yana uwezo wa kubeba tani laki 2.5 tu.

“Maghala yetu ya hifadhi ya chakula yanauwezo wa kubeba tani laki mbili na nusu tu, kwa hiyo kwa sasa tunatoa fursa kwa kampuni binafsi watusaidie kununua mahindi yenu, lakini fedha zenu za mahindi mliyoutuuzia zitakuja na mtalipwa muda si mrefu na mimi nitafuatilia,” alisema.

Akizungumza na wananchi wa Ludewa mara baada ya kuzindua maabara ya kisasa katika hospitali ya wilaya ya Ludewa pamoja na kuwaahidi kuwaletea vifaa tenganishi dawa na vifaa tiba, pia aliwaahidi kuwaletea meli ambayo itasaidia kurahisha safari za majini katika ziwa Nyasa kati ya wakazi ya tarafa ya Mwambao wilayani humo na Makete, wilaya ya Nyasa mkoani Ruvuma na Kyela katika mkoa wa Mbeya.

Hata hivyo Mbunge wa Ludewa Deo Filikunjombe leo alikuwa kivutio katika umati wa wananchi mjini Ludewa baada ya kujitokeza na kumuomba radhi Rais Kikwete kwa mambo aliyomkwaza, na kwamba mambo yote aliyomkwaza ni kwa ajili ya maendeleo ya wananchi wa Ludewa waliomtuma kuwawakilisha.

“Mh. Rais, baba yangu Kikwete najua kuna mambo mengi nimekukwaza nazungumza wazi lakini nakuomba unisamehe sana pale nilipokukwaza, ila najua katika maeneo yote niliyokukwaza ni kwa ajili ya maendeleo ya wananchi hawa walionituma kuwawakilisha,” alisema.

Alisema pamoja na mambo hayo yuko bega kwa bega naye katika kusimamia shughuli za maendeleo ya wananchi.