WANANCHI WA MTAA WA POSTA KATI MJINI NJOMBE WAMEMKATAA AFISA MTENDAJI WAO KWA TUHUMA MBALIMBALI

Wananchi wa mtaa wa posta kati wamemkataa afisa mtendaji wa mtaa

huo bi Esta Lwechungula kwa madai amekuwa akiwanyanyasa kwa kutumia

 madaraka yake pamoja na kuwatishia kuwapeleka katika baraza la

kata pindi wanapo dai madeni yao.

Aidha wananchi hao wamesema kuwa mtendaji huyo amekuwa akiingia

mpaka chumbani wakati wa kudai michango huku akiwabambikiza kesi

ambazo si za kweli pamoja na kuwachukulia polisi wakati wa kudai

michango ambapo wametishia kufunga na kufuri ofisi ya mtaa huo

endapo halmashauri haitamuondoa mtendaji huyo.

Wamesema kuwa serikali imekuwa ikifanya makosa kuwahamisha

watendaji ambao wamefanya makosa mahala pengine na kuwapeleka

sehemu nyingine hali inayopelekea watendaji hao kuendelea kuwaibia

mali wananchi huku wakihoji fedha anazotoa kwa jeshi la polisi

linapokwenda kuwakamata anazitoa wapi ambapo wametaka kusomewa

taarifa ya mapato na matumizi juu ya fedha alizotoa kwa jeshi la

polisi hao huku wakisema amekuwa na fitina na wanachi.

Hata hivyo wamesema kuwa mtendaji huyo ameshindwa kubainisha fedha

ambazo walichangia wananchi kwaajili ya mwanafunzi ambae

walimchangia kwaajili ya kupata mahitaji mbalimbali ya shule ambapo

baada ya wananchi kutoa fedha hizo yeye alimuazima mtoto huyo hadi

sasa anashindwa kumurudishia jambo linalowakatisha tamaa wananchi.

Akizungumza mbele ya wananchi hao afisa mtendaji wa kata ya Njombe

mjini Donald Mng'ong'o amewataka wananchi kuwa na subira wakati

malalamiko yao yakifikishwa kwa mkurugenzi wa halmashauri ya mji wa

Njombe na taratibu za kumuhamisha zikiendelea kufanyika ambapo

watapelekewa majibu ya kuhamishwa kwa mtendaji huyo.

Amesema kuwa wakati halmashauri ikijipanga kumuondoa mtendaji huyo

wananchi wataendelea kupata huduma za kiofisi katika ofisi hiyo

huku waliofanyiwa vibaya na mtendaji huyo wakitakiwa kupeleka

ushahidi na vielelezo ili aweze kufikishwa kwenye vyombo vya sheria

mtendaji huyo kwa sababu za msingi.

Diwani wa kata ya Njombe mjini Lupyana Fute amesema kuwa kama

malalamiko hayo ya wananchi ni ya msingi hatavumilia kuishi na

mtumishi anaejihusisha na matendo yasiyoridhisha wananchi huku

akiwataka wananchi kushiriki kikamilifu kuchyangia michango ya

ujenzi wa miradi mbalimbali inayotekelezwa katika mtaa huo ikiwemo

ofisi.

Aidha bwana Fute amesema kuwa kesi zote zilizofikishwa katika

baraza la kata na mtendaji huyo zikaondolewe na waliofikishwa

kwenye baraza hilo wawe huru ili kubaini ukweli wanaolalamikia

wananchi hao.