YANGA HAIKAMATIKI, YAICHAPA RUVU SHOOTING 1-0 NA KUZIDI KUJIKITA KILELENI

YANGA HAIKAMATIKI, YAICHAPA RUVU SHOOTING 1-0 NA KUZIDI KUJIKITA KILELENI

Kikosi cha Young Africans kilichoanza leo dhidi ya timu ya Ruvu Shooting

 

 

 

 

 

 

 

 

 

 

 

 

 

 

 

 

 

 

 

"Pisha pisha Yanga inapita"

"Pisha Njia Yanga inapita"

"Pisha pisha Mabingwa wanapita"

Hivyo ndivyo washabiki, wapenzi na wanachama wa klabu ya Young Africans Sports Club leo walivyokua wakiimba mara baada ya kumalizika kwa mchezo wa Ligi Kuu ya Vodacom, ambapo Yanga imeweza kushinda mchezo wa tano mfululizo kwa kuifunga Ruvu Shooting kwa bao 1- 0, mchezo uliofanyika katika Uwanja wa Taifa jijini Dar es salaam.

 

Young Africans imeendelea kujiweka katika nafasi nzuri ya msimamo wa Ligi Kuu ya Vodacom baada kufikisha point 48 na mabao 37 ya kufunga, pointi 11 mbele ya timu inayoshika nafasi ya pili Azam Fc yenye pointi 37 huku Yanga ikiwa mbele kwa mchezo mmoja.

Kikosi cha mholanzi Ernest Brandts kiliuanza mchezo kwa kasi na katika dakika ya 15 mshambuliaji Nizar Khalfani alikosa bao la wazi kufuatia kuwatoka walinzi wa timu ya Ruvu Shooting lakini shuti alilopiga lilitoka sentimeta chache ya lango la Ruvu Shooting.

Ruvu Shooting ilicheza soka la kushambulia kwa kushitukiza na kupitia washambuliaji wake Hassani Dilunga, Said Dilunga na Antony Kiiyala na katika dakika ya 24 ya mchezo Said Dilunga alikosa bao la wazi kufuatia kubakia yeye na mlinda mlango wa Yanga Ally Mustafa 'Barthez'.

 

Saimon Msuva alikosa nafasi ya kuipatia Young Africans bao la mapema kufuatia kutokua makini katika umaliziaji kufutia kupewa pasi safi nzuri na kiungo Frank Domayo lakini umakini wa Msuva ulipelekea kukosa bao hilo la wazi.

 

Mpaka dakika 45 za kipindi cha kwanza, Ruvu Shooting 0 - 0 Young Africans.

 

Kipindi cha pili kilianza kwa Yanga kufanya mabadiliko ambayo yaliipelekea Yanga kuimarika na kuutawala sehemu ya kiungo kwani kuingia kwa Luhende kuliongeza kasi ya mashambulizi kwa timu ya Yanga,

 

Dakika ya 48 ya mchezo, Hamis Kiiza aliipatia Young Africans bao la kwanza na bao la ushindi pekee katika mchezo huo kufuatia kumalizia mpira uliopigwa na Nizar Khalfani kumpita kipa Benjamin Haule na walinzi wake kisha kumkuta Kiiza aliyeukwamisha wavuni bila ajizi.

 

Kufuatia bao hilo, Ruvu Shooting walibadilika na kufanya mashambulizi ya kusaka bao la kusawazisha lakini umakini wa walinzi wa Yanga wakiongozwa na Nadir Haroub 'Cannavaro' na Mbuyu Twite ulikua kikwazo kwao kuweza kuipenya ngome hiyo.

 

Mshambuliaji Nizar Khalfani aliumia mguu kufuatia kukanyagwa na mlinzi wa Ruvu Shooting Shaban Ibrahim aliyemchezea ndivyo sivyo, kufuatia maumivu hayo Nizar alitolewa nje na nafasi yake kuchukuliwa na Didier Kavumbagu.

 

Mbadiliko hayo hayakubadili ubao wa matokeo, kwani mpaka dakika 90 za mchezo zinamalizika, Ruvu Shooting 0 - 1 Young Africans.

Kocha mkuu wa Yanga Ernest Brandts amesema anashukuru timu yake  kupata kwa ushindi katika mchezo wa leo, kipindi cha kwanza timu yangu haikucheza vizuri , lakini kipindi cha pili nilifanya mabadiliko na kubadili mfumo wa uchezaji hali iliyopelekea kupata bao hilo la ushindi.

"Kikubwa tulikuwa tunahitaji ushindi wa pointi 3 amabzo tumefanikiwa kuzipata, kila mchezo kwetu ni fainali ili kujiweka katika mazingira mazuri ya kutwaa Ubingwa, inabidi tushinde kila mchezo na ninashukru tumeshinda, tunajiandaa na mchezo dhidi  ya Polisi Morogoro mwishoni mwa mwezi siku ya jumamos ya tarehe 30.03.2013" alisema Brandts

Baada ya mchezo huu wa leo kocha wa Young Africans Brandts ametoa mapumziko ya siku tatu (3) kwa wachezaji ili waweze kupumzika na familia zao, na timu itaanza tena mazoezi siku ya jumatano kujiandaa na mchezo huo dhidi ya Polisi Morogoro utakaofanyika katika uwanja wa Jamhuri Morogoro.

Young Africans: 1.Ally Mustapha 'Barthez', 2.Juma Abdul, 3.Oscar Joshua/David Luhende, 4.Nadir Haroub'Cannavaro', 5.Mbuyu Twite , 6.Athuman Idd 'Chuji', 7.Saimon Msuva, 8.Frank Domayo, 9.Nizar Khalfani /Didier Kavumbagu,10.Hamis Kiiza, 11.Haruna Niyonzima