MKUU WA WILAYA YA WANGING'OMBE AWAPIGA MKWARA WATUMISHI KUHAMIA WILAYANI HUMO

Mkwara wa Mkuu wa Wilaya ya Wanging’ombe Fredrick Mwakalebela, umewafanya wafanyakazi wa  halmashauri ya wilaya  hiyo kuhamia katika eneo lao la kazi kata ya Igwachanya yalipo makao makuu ya wilaya hiyo, kutoka ofisi za halmashauri mama ya Njombe.

Hatua imekuja baada ya hivi karibuni Mkuu huyo wa wilaya, kuandika waraka uliosomwa katika baraza la madiwani wa halmashauri hiyo, ukiwataka watendaji wote wa halmashauri hiyo kuhamia katika makao hayo, ili kusogeza huduma kwa wananchi kama ilivyokuwa makusudi mazima ya serikali kuanzisha wilaya hiyo, na kwamba watakaokaidi agizo hilo atachukua maamuzi magumu dhidi yao.

“Naagiza watumishi wote wa halmashauri ya Wilaya ya Wanging’ombe kuhamia Igwachanya ili waweze kutekeleza majukumu yao vyema ya kuwatumikia wananchi wa Wanging’ombe, atakayeshindwa kutekeleza agizo hili nitachukua maamzi magumu dhidi yake,” alisema Mwakalebela katika waraka huo.

Kitendo hicho cha mkuu wa wilaya kulivalia njuga suala hilo kimewafanya watumishi hao kuhamia wilayani humo ili kuendelea na majukumu yao ya kulitumikia taifa.

Madiwani wa Halmashauri ya Wilaya ya Wanging’ombe wakiongozwa na Mwenyekiti wa halmashauri hiyo, Anthony Mahwata, walipongeza hatua hiyo ya mkuu wa wilaya, kwa kusema kuwa kitendo hicho kimesaidia utekelezaji wa huduma za kijamii kwa wananchi kwa sasa kwenda kasi, tofauti na awali wakati ambapo watumishi hao walikuwa wakiishi mjini Njombe.

“Tunampongeza sana mkuu wetu wa Wilaya Mwakalebela (Fredrick) kwa kuamru watumishi hawa kuhamia katika makao makuu ya wilaya hapa Igwachanya, maana tukiangalia kwa sasa huduma za kijamii zinaenda kwa kasi na miradi mbalimbali ya maendeleo inasimamiwa kwa karibu zaidi, kwa kweli ni kiongozi bora,” alisema Mahwata.

Akizungumza na gazeti hili, Kaimu Mkurugenzi wa Halmashauri ya Wilaya ya Wanging’ombe, Emmanuel Kilundo, alisema sababu zilizokuwa zikiwafanya watumishi hao wasihamie katika makao makuu ya wilaya hiyo ni ukosefu wa miundombinu ya kufanyia kazi, ikiwemo ofisi na nyumba za kuishi pamoja na madai ya uhamisho wao.

Alisema kwa sasa wameamua kuhamia wilayani humo kutokana na agizo hilo la mkuu wa wilaya, na baada serikali kuahidi kuwalipa madai yao hivi karibuni.

“Siyo kwamba watumishi walikuwa hawataki kuhamia hapa Igwachanya ila kilichokuwa kinakwamisha ni changamoto mbalimbali ikiwemo ukosefu wa miundombinu ya ofisi, nyumba za kuishi na madai ya kuhamishwa, hata sasa hivi wamehamia hapa lakini bado wanaidai serikali ingawa imeahidi itawalipa hivi karibuni,” alisema Kilundo.

Katika hatua nyingine, Mwakalebela aliwaagiza wakandarasi wanaojenga ofisi na nyumba za watumishi wilayani humo, kukamilisha haraka ujenzi huo kwa mujibu wa mikataba, ili kuwawezesha watumishi wa wilaya hiyo, kuwa na ofisi bora za kufanyia kazi pamoja na nyumba za kuishi.

Alisema kukamilika kwa majengo hayo katika Kata ya Igwachanya, pia kutasaidia kuondoa mvutano uliopo kuhusu makao makuu ya wilaya hiyo, kati ya Igwachanya yalipotangazwa na kupitia gazeti la serikali na maeneo mengine ya kata za Ilembula, Wanging’ombe na Mdandu yanayotajwa kwa sababu za kisiasa, na hivyo kuwavuruga na kuwachanganya wananchi kutokufahamu ni wapi yalipo makao makuu halali ya wilaya hiyo.

>>>>>>END.