Filikunjombe mbunge wa CCM asema ‘serikali imevaa miwani ya mbao’, aahidi kuitisha maandamano kwake endapo hawatapata huduma za msingi!

 Ni mbunge wa Ludewa Deo Filikunjombe CCM kushoto na Mbunge wa Iringa Mjini Mch.Saimon Peter Msigwa Chadema Pichani.

Hili ni bunge la Tanzania.

Bunge la kumi la Jamhuri ya muungano wa Tanzania linaendelea mjini Dodoma huku likiwa limepanda joto kali kutokana na changamoto za matumizi ya lugha.

Leo asubuhi mbunge wa Ludewa kwa tiketi ya
chama cha mapinduzi (CCM) Deo Filikunjombe amekutana na kikwazo cha kiti cha spika wa bunge Anne Makinda baada ya kutumia maneno ambayo yalionekana kuwa sio ya kibunge.

Filikunjombe alisema, “Mi nianze kusema bayana kwamba mi siungi mkono hoja kwa asilimia 100 kwa sababu zifuatazo, siungi mkono hoja kwa sababu kila anaeona atakuwa shahidi kuwa serikali yetu imekuwa sio serikali sikivu kwa vitendo,na serikali yetu imekuwa na tabia ya kufunika kombe ili mwanaharamu apite, siungi mkono hoja kwa sababu serikali yetu imevaa miwani ya mbao na imeziba masikio.”

Hata hivyo spika wa bunge hilo alimkatisha Filikunjombe na kumtaka aondoe maneno aliyosema ‘serikali imevaa miwani ya mbao’, na mbunge huyo alifanya hivyo na kusisitiza kuwa serikali sio sikivu na imeziba masikio.

Mbunge huyo aliongeza kuwa mawaziri wa serikali wamekuwa wakilindana na kwamba mawaziri wanaowajibika ni wachache na wanaweza wakawa kumi tu kati ya idadi kubwa ya mawaziri wa serikali ya Jamhuri ya Muungano wa Tanzania.

Pia alitoa wito kwa wabunge wa chama cha mapinduzi kubadilika na kuacha kubeza kila hoja za wapinzani, “waheshimiwa wabunge wenzangu hasa sisi wa chama tawala, ifike mahala tuache kubeza kila hoja za wapinzani, tusiwabeze badala yake tuchukue hoja zao tuzipime na tuzifanyie kazi.”

Mwakilishi huyo wa wananchi wa jimbo la Ludewa alimaliza kwa kutaja mahitaji muhimu ya jimboni kwake kuwa ni vitu vichache kama meli, na meli zilizopo kama MV Songea na MV Iringa ni mbovu na hazifanyi kazi, ukosefu wa barabara ya lami, na kutokuwepo kwa chuo cha VETA, na kwamba kama hawatapata huduma hizo muhimu na wao pia watakwenda kuandamana barabarani wakiwa na sare zao za kijani bila kujali kuwa ni siku ya jumatatu, ijumaa au ni jumapili.

chanzo leotainmentblogu.