Maaskofu wafurahishwa Makamu wa Rais kukubali kuwa mgeni rasmi Tamasha la Krismasi

Na Mwandishi Wetu

MAASKOFU wa madhehebu  mbalimbali wa Makanisa hapa Tanzania wamempongeza Makamu wa Rais Samia Suluhu Hassan kukubali kuwa mgeni rasmi katika Tamasha la Krismasi linalotarajia kufanyika Desemba 25 kwenye ukumbi wa Diamond Jubilee jijini Dar es Salaam.

Tamasha hilo linalokwenda sambamba na Shukrani kwa Mungu baada ya uchaguzi Mkuu uliofanyika Oktoba 25 kwa amani na utulivu, uwanja wa Taifa jijini Dar es Salaam.

Askofu wa Kanisa la KKKT, Dk Alex Malasusa anasema ni jambo jema kumshukuru Mungu baada ya uchaguzi Mkuu uliofanyika kwa amani na utulivu kiasi cha kumpata rais mchapakazi.

Amefurahishwa na kukubali kuwa mgeni rasmi kwa kuitikia wito wa ombi la madhehebu mengine ingawa yeye ni Muislamu kwani kufanya hivyo ni kuzidi kuvunja makundi ya udini ndani ya nchi yetu.

Anasema ni  wakati wa kumshukuru Mungu baada ya  tukio kubwa la uchaguzi Mkuu ambako kabla yalifanyika maombi ya kumuomba Mungu kuwapitisha katika uchaguzi Mkuu ambao ulifanyika kwa amani na utulivu.      

Askofu Dk. Valentino Mokiwa wa Kanisa Anglican,  jimbo Kuu la Dar es Salaam, amempongeza Msama Promotions kwa kuandaa matamasha ya kumuimbia na kumtukuza  Mungu kupitia matamasha yake.

Askofu Mokiwa anasema ni suala la kujivunia ikiwa ni mara ya kwanza kuwa na mgeni rasmi ambaye ni mwanamke wa kwanza nchini kuwa Makamu wa Rais na kitendo chake kinaonekana kuwa ni cha kizalendo.

 Anasema ni jambo la kumshukuru Mungu baada ya kufanikisha kumalizika kwa uchaguzi mkuu uliofanyika Oktoba 25 mwaka huu hivyo amemtaka Mkurugenzi wa Msama Promotions, Alex Msama kuendelea kujitolea kuandaa matamasha  kama hayo yenye tija kwa taifa.

Naye  Askofu Mkuu wa jimbo la Mashariki la Kanisa la Tanzania Assemblies of God (TAG) Dk Lawrence Kameta anasema amefurahishwa  na  Makamu  wa  Rais, kuonesha uzalendo na kukubali kuwa mgeni rasmi katika tamasha hilo ambalo lenye lengo la kushukuru baada ya uchaguzi Mkuu uliofanyika Oktoba 25 mwaka huu.

Anasema kuwa kitendo hicho cha Makamu wa Rais Samia Suluhu Hassan  kuwa Mgeni rasmi kimezidi kuiaminisha Dunia kuwa Tanzania ni ya amani na haina matabaka ya kidini na ukabila.

Katibu Mkuu wa Makanisa ya Kipentekoste nchini, Askofu David Mwasota amesema kwamba Tanzania imezaliwa upya kwa kutinga katika neema ambayo ilikuwa inatarajiwa na wengi.

Askofu Mwasota anasema  kuwa Rais Magufuli  hakukosea kumteua mama Samia kuwa makamu wa Rais  wa jamhuri ya Muungano wa Tanzania.

Askofu wa Kanisa la Wasabato, Warwa Marekana anasema wamefurahishwa na Makamu wa Rais Samia Suluhu Hassani kukubali kuwa mgeni rasmi katika tamasha la Krismasi ambalo linakwenda sambamba na kushukuru Tanzania kupita kwenye uchaguzi Mkuu uliofanyika Oktoba 25.

Marekana anasema kukubali kuwa mgeni rasmi inathibitisha kwamba tamasha hilo halina ubaguzi wa dini kwani Waislamu na Wakristo   

Askofu  wa Kanisa Katoliki Jimbo la Morogoro, Telesphor Mkude amesema kuwa kama amani itakuwepo nchini ana amini serikali ya Awamu ya Tano chini ya John Pombe Magufuli kutakuwa na mabadiliko makubwa ya kimaendeleo.

Amesema kuwa wao kama viongozi wa dini wanafurahishwa na jinsi kiongozi mwanamama shupavu tena muislamu kuamua kuabudu pamoja na wakristo katika  tamasha hilo la shukrani.

 

Hiyo ni nzuri na sisi kama viongozi wa dini tunaiunga mkono kampuni ya Msama Promotions kwa kutoa mwaliko kwa Makamu wa Rais hivyo tunaamini atakuwa chachu ya kuwahimiza wananchi wengine ambao sio wakristo kujumuika katika kutoa shukrani kwa mungu mara baada ya kumalizika kwa uchaguzi mkuu.

Alisema, hata kama Magufuli atakuwa ni kiongozi bora kiasi gani lakini kama amani haitapatikana itakuwa ni kazi bure hivyo amewataka wananchi kuienzi amani iliyopo.

Alisema amekuwa akifuatilia matamasha yanayoandaliwa na kampuni ya Msama Promotions, yamekuwa yakilenga katika jamii hivyo ni kitu  cha kushukuru kwa kampuni hiyo kuandaa matamsha kwa lengo la kuenzi amani.

Amesema angeomba hali hiyo iendelee hata mikoani  ili kuwafanya wananchi wa mikoani kuona umuhimu wa amani haiitajiki Dar es Salaam pekee.

Amesema kuwa anashukuru kumaliza kwa uchaguzi mkuu kumalizika salama  na nchi imepoa baada ya kupatikana Rais ambaye anaonekaa kuwa na dhamira ya kweli katika kuhakikisha anaipelekea Tanzania katika uchumi wa kati.

Askofu Mkude amesema suala la amani ni muhimu na amewataka Maaskofu na Mapadri kuhakikisha wanahubiri amani wanapokuwa katika ibada zao.

Askofu wa Kanisa la Menonite, Amos Mhagache amesema ni nafasi yetu kumshukuru Mungu kwa kutubariki kupita katika kipindi kigumu cha uchaguzi Mkuu.

Askofu Mhagache anasema kwamba Yesu Kristo ni mwokozi hasa sasa hivi ndio nchi Mungu aliyotupa katika kipindi hiki baada ya uchaguzi Mkuu uliofanyika Oktoba 25.